STAREP-ის ქვეყნების კონსოლიდირებული პოზიცია მსს ფასს სტანდარტის ცვლილების თაობაზე ფასს ფონდის ვებგვერდზე განთავსდა

ბუღალტრული აღრიცხვის საერთაშორისო სტანდარტების საბჭომ (IASB) მსს ფასს სტანდარტში მოსალოდნელ ცვლილებებზე უკუკავშირის მიღების მიზნით განცხადება 2019 წლის მეორე ნახევარში გააკეთა.

მსოფლიო ბანკის ფინანსური ანგარიშგების რეფორმების ცენტრის (CFRR) ორგანიზებით, STAREP-ის პროგრამის ფარგლებში მნიშვნელოვანი პროექტი განხორციელდა, რომლის მიზანს მსს ფასს სტანდარტში მოსალოდნელ ცვლილებებთან დაკავშირებით პროფესიული მოსაზრებების რეგიონალურ დონეზე კონსოლიდაცია წარმოადგენდა. პროექტში STAREP-ის წევრი სამი ქვეყნის საზედამხედველო ორგანოები და პროფესიული წრეები იღებდნენ მონაწილეობას - მათ მიერ შემუშავებული კონსოლიდირებული პოზიცია მსოფლიო ბანკმა ფასს ფონდს გადასცა. მიღებული პოზიცია, ფასს ფონდმა, სხვა მოსაზრებებთან ერთად, თავის ვებ-გვერდზე განათავსა.

IASB-ი განიხილავს არგუმენტირებულ შეთავაზებებს და მსს ფასს სტანდარტში ცვლილების განხორციელებისას გაითვალისწინებს. საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახური IASB-ის მხრიდან შესაბამისი გადაწყვეტილების მიღების პროცესს თვალს ადევნებს და შედეგებს დროულად გაუზიარებს პროფესიულ საზოგადოებას.

სამსახური კიდევ ერთხელ უხდის მადლობას თითოეულ პირს, რომელმაც მონაწილეობა მიიღო საქართველოს მხრიდან პოზიციის ფორმირებაში.