საქართველოს ფინანსური მონიტორინგის სამსახურისათვის ინფორმაციის მიწოდების ვალდებულება

„უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის შესაბამისად, განსაზღვრულია მონიტორინგს დაქვემდებარებული გარიგებები და მონიტორინგის განმახორციელებელი პირის (პირი რომელიც საქართველოს კანონმდებლობით დადგენილი წესით ეწევა საბუღალტრო ან/და აუდიტორულ საქმიანობას) ვალდებულებები გარიგების და მასში მონაწილე პირების შესახებ ინფორმაციის (დოკუმენტების) აღრიცხვასთან დაკავშირებით.

„საბუღალტრო ან/და აუდიტორული საქმიანობის განმახორციელებელი პირების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ“ დებულების დამტკიცების თაობაზე საქართველოს ფინანსური მონიტორინგის სამსახურის უფროსის 2012 წლის 31 იანვრის N12 ბრძანების მე-3 პუნქტის  თანახმადაც, საბუღალტრო ან/და აუდიტორული საქმიანობის განმახორციელებელი პირები, რომლებიც ფუნქციონირებას დაიწყებენ მოქმედი კანონმდებლობით დადგენილი წესით, საქმიანობის უფლების მოპოვებიდან 1 თვის ვადაში, ვალდებულნი არიან საქართველოს ფინანსური მონიტორინგის სამსახურში წარადგინონ აღრიცხვის ფორმა. 

საქართველოს ფინანსური მონიტორინგის სამსახურს აღრიცხვის ფორმა წარედგინება მათი სამსახურის ოფიციალურ ვებგვერდზე (www.fms.gov.ge) განთავსებული ვებპორტალის მეშვეობით.