სამსახურის (SARAS) ნორმატიულ აქტებში განხორციელდა ცვლილება

ცვლილება შეეხება აუდიტირებული ანგარიშგების სამსახურში გადაგზავნის წესს, სუბიექტი ანგარიშგებას უგზავნის აუდიტორს, რომელიც ადასტურებს ანგარიშგებას შესაბამისი ტექნიკური საშუალებით. აუდიტორის მიერ დადასტურების შემდგომ, ანგარიშგება სუბიექტის მიერ სამსახურში წარდგენილად ჩაითვლება. 

კანონქვემდებარე აქტში, ასევე, ზუსტდება, რომ სამსახურისთვის ანგარიშგების/ანგარიშგებების კანონმდებლობით დადგენილ ვადაში წარდგენაზე პასუხისმგებელია სუბიექტი. 

წარმოდგენილი ბრძანების პროექტის შემუშავება განპირობებულია კანონქვემდებარე აქტში საკანონმდებლო ნორმის დაზუსტების საჭიროებით და სამსახურის მიზნით, გამოკვეთოს ანგარიშგების წარდგენის პროცესში სუბიექტის როლი და პასუხისმგებლობა ანგარიშგების წარდგენის პროცესის კონტროლზე.  

ცვლილება ასევე განხორციელდა ,,ფულადი ჯარიმის დაკისრების შესახებ ინდივიდუალური ადმინისტრაციულ-სამართლებრივი აქტის იძულებითი აღსრულების წესისა და სააღსრულებო ფურცლის ფორმის დამტკიცების თაობაზე“ ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსის 2020 წლის 28 ოქტომბრის №ნ-12 ბრძანებაში. 

სუბიექტების ინტერესისა და სამსახურის მხრიდან სამართალდარღვევებზე სამართლებრივად სწორად რეაგირების მიზნებიდან გამომდინარე, საჭირო გახდა, რომ  სამსახურის მხრიდან არაუმეტეს 6 თვის ვადაში უზრუნველყოფილი იქნას სააღსრულებო ფურცლის შედგენისა და აღსრულების ეროვნულ ბიუროში გადაგზავნის ვალდებულება - სამსახურის ხედვით აღნიშნული ვადა გონივრულია, რათა მოესწროს პირის მიერ გასაჩივრება და საბჭოს მიერ სხდომის ჩანიშვნა/საბოლოო გადაწყვეტილების მიღება. გარდა ამისად, ცვლილება განპირობებულია მიზნით,  ნორმატიულ აქტში არსებული ფორმულირებები ჩამოყალიბდეს სწორი სამართლებრივი ტექნიკით.