სამსახურის (SARAS) წარმომადგენლები საუკეთესო წლიური ანგარიშის და გამჭვირვალობის ჯილდოს (BARTA) გადაცემის რიგით მეექვსე ღონისძიებას დაესწრნენ

მსოფლიო ბანკმა, საუკეთესო წლიური ანგარიშის და გამჭვირვალობის ჯილდოს (BARTA) გადაცემის რიგით მეექვსე ცერემონიაზე გამორჩეული კორპორაციული ანგარიშგების და გამჭვირვალობის პრაქტიკის მქონე კომპანიები გამოავლინა. BARTA მიზნად ისახავს კომპანიების წახალისებას საუკეთესო პრაქტიკების დანერგვის მიმართულებით, რასაც შედეგად უფრო მეტად გამჭვირვალე და კონკურენტული ბიზნესგარემოს შექმნა მოჰყვება. 

წლევანდელი ღონისძიების ერთ-ერთი მნიშვნელოვანი სიახლე იყო პანელური დისკუსია, რის ფარგლებშიც დაიფარა ისეთი საკითხები, როგორიცაა  ბოლო წლებში კორპორაციული ანგარიშგების სფეროში განვითარებული ტენდენციები, მდგრადობის ანგარიშგების მნიშვნელობა და მისი გავლენა ბიზნეს გარემოზე, ასევე გლობალური და ევროპული სტანდარტების შესაბამისად ქართული კომპანიების წინაშე არსებული გამოწვევები.  

პანელურ დისკუსიაში მონაწილეობა სამსახურის (SARAS) აუდიტისა და პროფესიული განათლების ზედამხედველობის დეპარტამენტის ხელმძღვანელმა, თორნიკე ძაგნიძემ მიიღო, რომელმაც ანგარიშგების სტანდარტების გაუმჯობესებასა და გამჭვირვალობის ხელშეწყობაში BARTA-ს როლზე ისაუბრა. ასევე განიხილა მარეგულირებელი ჩარჩოს დახვეწის საჭიროებასა და კომპანიების მზაობის მნიშვნელობაზე ახალი მოთხოვნების დასაკმაყოფილებლად, და ყურადღება გაამახვილა იმ ნაბიჯებზე, რომლებზეც სამსახური (SARAS) მუშაობს მდგრადობის ანგარიშგების პრაქტიკის გასაუმჯობესებლად.

მსოფლიო ბანკთან, საქართველოს ეროვნულ ბანკთან, საქართველოს დაზღვევის სახელმწიფო ზედამხედველობის სამსახურთან და ბუღალტრული რეფორმის ბენეფიციართა ფონდთან პარტნიორობით BARTA-მ გამარჯვებულები 9 კატეგორიაში და ახალ, საუკეთესო დებიუტანტი კომპანიის ნომინაციაში გამოავლინა. 

გამარჯვებულთა შერჩევის პროცესი, საერთაშორისო ჟიურის ხელმძღვანელობით, მტკიცე მეთოდოლოგიის გამოყენებით წარიმართა, რომელიც ხაზს უსვამს არაფინანსურ ინფორმაციას და აფასებს ისეთ მახასიათებლებს, როგორიცაა გამჭვირვალობა და ანგარიშვალდებულება. ეს ინიციატივა კომპანიებს ხელს უწყობს ანგარიშგების რეგულაციებთან შესაბამისობის მიღწევაში და კორპორაციული ანგარიშგების საერთო ხარისხის გაუმჯობესებაში.

BARTA 2019 წელს შეიქმნა ევროკავშირის და მსოფლიო ბანკის პარტნიორობით და ხელს უწყობს ქართულ კომპანიებში კორპორაციული ანგარიშგების ხარისხის და გამჭვირვალობის მიმართულებით არსებული გამოწვევების დაძლევას. 2024 წლიდან ინიციატივის მხარდაჭერას მსოფლიო ბანკის  ბუღალტრული აღრიცხვის, აუდიტის და მდგრადი განვითარების ანგარიშგების გაუმჯობესების რეგიონული პროგრამა  (EAASURE) ახორციელებს, რომელიც ფინანსური და მდგრადობის ანგარიშგების რეფორმის ცენტრის მიერ განხორციელებული რეგიონული პროგრამაა.