სამსახურმა თარგმნა და აქვეყნებს მდგრადობის ანგარიშგების სტანდარტების (European Sustainability Reporting Standards – ESRS) პირველად პროექტს

მდგრადობის ანგარიშგების ევროპული სტანდარტები (European Sustainability Reporting Standards - ESRS) შემუშავებულია ევროპის ფინანსური ანგარიშგების მრჩეველთა ჯგუფის (EFRAG) მიერ და ევროკავშირში შემავალ ქვეყნებში სამოქმედოდ დაინერგა 2023 წლის 31 ივლისს. სტანდარტების მიზანია საწარმოების მდგრადი განვითარების პროცესში გამჭვირვალობის და ანგარიშვალდებულების გაზრდა.
ქართულ ენაზე წარმოდგენილია 12 სტანდარტი, აქედან 2 საერთო სტანდარტი (ESRS 1 და ESRS 2), ეხება ანგარიშგების მომზადების ზოგად პრინციპებს, ხოლო 10 თემატური სტანდარტი, მოიცავს გარემოსდაცვით, სოციალურ და მმართველობით (ESG) საკითხებს.

საერთო სტანდარტები ეხება ყველა საწარმოს მიუხედავად იმისა, თუ რომელ სექტორში ფუნქციონირებს ის. ხსენებული სტანდარტები მოიცავს ანგარიშგების მომზადების იმ ძირითად და ზოგად პრინციპებს, რომლებიც საწარმოებმა უნდა გაითვალისწინონ. კერძოდ, საწარმოს ზემოქმედების, რისკებისა და შესაძლებლობების არსებითობის შეფასებას და მათთან დაკავშირებით მდგრადობის ინფორმაციის შეგროვებასა და წარდგენას. ასევე, საწარმოში ამ მიმართულებით არსებული პოლიტიკისა და მიზნების შესახებ ანგარიშგების მომზადების საფუძვლებს და ზოგად პრინციპებს.
თემატური სტანდარტები კი ეხება მდგრადობასთან დაკავშირებულ საკითხებს კონკრეტულად გარემოსდაცვითი, სოციალური და მმართველობის (Environmental, Social, Governance – ESG) მიმართულებით და მოიცავს დეტალურ ინფორმაციას იმის შესახებ, თუ როგორ უნდა მოამზადონ საწარმოებმა მდგრადობის ანგარიშგება თითოეული საკითხის გათვალისწინებით.

სამსახურთან, კორპორაციული მდგრადობის ანგარიშგების სტანდარტის (ESRS) მაღალი ხარისხით თარგმნის, სისწორის, ტერმინთა შეთანხმებისა და სამოქმედოდ შემოღების უზრუნველყოფის მიზნით, შეიქმნა ექსპერტთა ჯგუფი, რომელიც აერთიანებს წევრებს როგორც საჯარო, ისე კერძო სექტორიდან.

კომიტეტის მუშაობის ფარგლებში განხორციელდა სამსახურის მიერ თარგმნილი სტანდარტების განხილვა სფეროს სპეციალისტების მიერ და საჭიროებისამებრ მოხდა უკუკავშირის გათვალისწინება.

ამ ეტაპზე, სამსახური ახორციელებს წინამდებარე სტანდარტების სამოქმედოდ შემოღებასთან დაკავშირებული კანონპროექტის შემუშავებისა და ინიცირების პროცესს. კანონის ცვლილებასა და თარგმანის ვერსიებს შორის სხვაობის არსებობის შემთხვევაში უპირატესობა კანონმდებლობის დებულებებს მიენიჭება, ხოლო სტანდარტში შესაბამისი ცვლილებები განხორციელდება.
სტანდარტების ქართულენოვან ვერსიაში წარმოდგენილი ტექსტისა და ტერმინოლოგიის დახვეწა გრძელდება, შესაბამისად, გთხოვთ, მოგვაწოდოთ წინადადებები ან/და რეკომენდაციები ელექტრონულად (სამსახურისათვის ელ.წერილის გაგზავნის ფუნქციონალის მეშვეობით - https://saras.gov.ge/ms/).

აღსანიშნავია, რომ სტანდარტების დანერგვის პროცესი ხელს უწყობს საქართველოში მდგრადი განვითარების მიმართულებით საერთაშორისო სტანდარტებთან შესაბამისობას და ბიზნეს სექტორში გამჭვირვალობის გაძლიერებას.