ანგარიშვალდებული პირის ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ფორმების შევსებისა და წარდგენის წესის დამტკიცების თაობაზე ახალი ნორმატიული აქტი შევიდა ძალაში

2024 წლის 09 დეკემბერს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსის N ნ-16 ბრძანებით დამტკიცდა ანგარიშვალდებული პირის ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ფორმების შევსებისა და წარდგენის წესი.
ახალი წესის შესაბამისად, ანგარიშვალდებულ პირებს (სერტიფიცირებულ ბუღალტრებს, პროფესიული მომსახურების გამწევ ბუღალტრებს, საბუღალტრო ფირმებს, აუდიტორებს ან/და აუდიტორულ (აუდიტური) ფირმებს) ყოველი წლის 01 იანვრიდან 31 დეკემბრის საანგარიშგებო პერიოდზე, არაუგვიანეს მომდევნო წლის 31 იანვრისა ექნებათ ვალდებულება წარადგინონ ფულის გათეთრებისა და ტერორიზმის დაფინანსების რისკის ზედამხედველობის შესახებ წლიური ანგარიშგება.

გამონაკლისია შემთხვევა, როდესაც:
ა) ანგარიშვალდებული პირის ფულის გათეთრებისა და ტერორიზმის დაფინანსების რისკის დონემ ან/და სხვა ფულის გათეთრებისა და ტერორიზმის დაფინანსების მიზნებისთვის მნიშვნელოვანი ფაქტორები, რომლის საფუძველზეც კონკრეტული ანგარიშვალდებული პირისთვის სამსახურის გადაწყვეტილებით დადგენილია განსხვავებული საანგარიშგებო პერიოდი (უფრო მოკლე ან ხანგრძლივი);
ბ) პირველი ანგარიშგების წარდგენა, კერძოდ, 2025 წლის საანგარიშგებო პერიოდისთვის ანგარიშვალდებული პირი წარადგენს წლიურ ანგარიშგებას, რომლის საანგარიშგებო პერიოდიც იქნება   2025 წლის 01 მარტიდან 2025 წლის 31 დეკემბრის ჩათვლით. აღნიშნული ანგარიშგების წარდგენა ანგარიშვალდებულ პირებს ევალებათ, დაუყოვნებლივ, არაუგვიანეს 2026 წლის 31 იანვრისა.

ანგარიშგება მოიცავს 7 ფორმას, რომლებიც ეხება კლიენტთა საქმიანობას, მათ გეოგრაფიულ არეალს, გარიგებების ტიპებს და სხვა მნიშვნელოვან ასპექტებს. ასევე, ფორმები მოიცავს ინფორმაციას სსიპ საქართველოს ფინანსური მონიტორინგის სამსახურში გაგზავნილ ანგარიშგებას საეჭვო გარიგების ან ასეთი გარიგების მომზადების, დადების ან შესრულების მცდელობის შესახებ და არსებული რეკომენდაციების შესრულების შესახებ ინფორმაციას.

წესი სამსახურს (SARAS) აძლევს საშუალებას, ეფექტიანად, რისკზე დაფუძნებული მიდგომით მოახდინოს ანგარიშვალდებული პირის ფულის გათეთრებისა და ტერორიზმის დაფინანსების პირველადი რისკების შეფასება და განახორციელოს ეფექტიანი ზედამხედველობა საერთაშორისო და ადგილობრივი პრაქტიკის შესაბამისად.

სამსახური 2024 წლის ბოლომდე უზრუნველყოფს ანგარიშგების ელექტრონული წარდგენის პროგრამულ უზრუნველყოფას აღნიშნული წესის მოთხოვნების შესაბამისად.