IAASB-მა მდგრადობის მარწმუნებელი საერთაშორისო სტანდარტი (ISSA 5000) დაამტკიცა: ახალი ეტაპი მდგრადობის მარწმუნებელი მომსახურების მიმართულებით

აუდიტისა და მარწმუნებელი მომსახურების საერთაშორისო სტანდარტების საბჭომ (IAASB) მდგრადობის მარწმუნებელი საერთაშორისო სტანდარტი (ISSA 5000) - დაამტკიცა. ხსენებული სტანდარტი მდგრადობის მარწმუნებელი მომსახურების მიმართულებით ახალ ათვლის წერტილს წარმოადგენს. ეს უმნიშვნელოვანესი მოვლენაა, გამომდინარე იქიდან, რომ მდგრადობის ანგარიშგება სულ უფრო მნიშვნელოვანი ხდება კორპორაციული სტრატეგიების შემუშავებისა და ინვესტორების მიერ გადაწყვეტილების მიღების პროცესში. მთელს მსოფლიოში მდგრადობის მიმართულებით სანდო მონაცემებზე მზარდი მოთხოვნის ფონზე, ISSA 5000 სწორედ ისეთი ერთიანი, გლობალური ჩარჩოს არსებობის საჭიროებას პასუხობს, რომელიც მდგრადობის შესახებ გამჟღავნებული ინფორმაციის სანდოობას უზრუნველყოფს.
 
ISSA 5000-ს მდგრადობის მარწმუნებელი მომსახურების სფეროში შემოაქვს რისკზე დაფუძნებული მიდგომა, მასში ხაზგასმულია  გაძლიერებული პროფესიული სკეპტიციზმის საჭიროება, ასევე  უფრო მეტი გამჭვირვალობა მარწმუნებელი გარიგების პროცესში. იგი გამოიყენება მდგრადობის საანგარიშგებო საკითხების ფართო სპექტრის მიმართ, კლიმატთან დაკავშირებული რისკებით დაწყებული, სოციალური და მმართველობის მონაცემების ჩათვლით. აღსანიშნავია, რომ სტანდარტს მხარდაჭერა გამოუცხადა ფასიანი ქაღალდების კომისიების საერთაშორისო ორგანიზაციამ (IOSCO), რაც კიდევ უფრო ზრდის მის შესაბამისობასა და მნიშვნელობას გლობალურ დონეზე. 

გარემოსდაცვითი, სოციალური და მმართველობის (ESG) საკითხების მიმართ გლობალური ყურადღების ზრდის ფონზე, მდგრადობის მიმართულებით გამჟღავნებული ინფორმაციის რწმუნების საჭიროება განსაკუთრებულად აქტუალური გახდა. ISSA 5000-ის გამოყენებით მარწმუნებელი მომსახურების პრაქტიკოსებს ექნებათ ის ინსტრუმენტები და სახელმძღვანელო მითითებები, რაც საჭიროა ამ მიმართულებით არსებული მოთხოვნის დასაკმაყოფილებლად და კომპანიებისთვის მდგრადობის მიმართულებით მათი განაცხადის ვერიფიცირების პროცესში მხარდასაჭერად. ეს სტანდარტი არა მარტო მდგრადობის ანგარიშგების სანდოობას გააძლიერებს, არამედ მთელს მსოფლიოში გაზრდის ინვესტორების მხრიდან ნდობას.
 
საქართველოს ფინანსთა სამინისტრო, ბუღალტრული აღრიცხვის, ანგარიშგებისა და აუდიტის ზედამხედველობის სამსახური (SARAS), აღიარებს ამ სტანდარტის მნიშვნელოვნებას. სამსახური, თავის მხრივ, მზად არის წარმართოს შემდგომი საკანონმდებლო პროცესები აღნიშნული სტანდარტის ქართულ ენაზე სამოქმედოდ შემოღებისა და ქვეყანაში მისი ეფექტიანად დანერგვის მიზნით