სამსახური (SARAS) აუდიტორებისთვის/აუდიტორული ფირმებისთვის შეტყობინებას ავრცელებს

„ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონში და ,,ხარისხის მართვის სისტემის მონიტორინგის განხორციელების წესის შესახებ“ ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსის 2017 წლის 12 ივლისის Nნ-9 ბრძანებით დამტკიცებულ წესში განხორციელებული რიგი ცვლილებების შესაბამისად შეგახსენებთ, რომ:

• 2025 წლის 01 იანვრიდან გარიგების პარტნიორს არ აქვს უფლება იყოს გარიგების პარტნიორი ერთზე მეტ აუდიტორულ ფირმაში ან აუდიტორულ ფირმაში გარიგების პარტნიორად ყოფნის პარალელურად ინდივიდუალურად ახორციელებდეს აუდიტორულ მომსახურებას. 
  
  შესაბამისად, ის აუდიტორები, რომლებიც გარიგების პარტნიორად არიან რეგისტრირებული ერთზე მეტ აუდიტორულ ფირმაში ან აუდიტორულ ფირმაში გარიგების პარტნიორად ყოფნის პარალელურად ინდივიდუალურად ახორციელებენ აუდიტორულ მომსახურებას, ვალდებული არიან 2025 წლის 01 იანვრამდე ნებისმიერ დროს, ცვლილების განხორციელებიდან 5 სამუშაო დღის ვადაში, სამსახურს ოფიციალური განცხადებით წერილობითი ან/და ელექტრონული ფორმით (https://saras.gov.ge/ms/) აცნობონ თუ რომელ აუდიტორულ ფირმაში დარჩებიან/იქნებიან გარიგების პარტნიორად ან თუ აპირებენ აუდიტორული საქმიანობის მხოლოდ ინდივიდუალურად განხორციელებას;

• აუდიტორი/აუდიტორული ფირმა, რომელსაც გავლილი არ აქვს მონიტორინგი ან რომელიც სამსახურის მიერ განისაზღვრა არასავალდებულო აუდიტორად/აუდიტორულ ფირმად 2024 წლის 21 მაისიდან ვალდებულია სამსახურს ელექტრონულად წარუდგინოს ინფორმაცია ნებისმიერი ზომითი კატეგორიის მქონე სუბიექტთან ფინანსური ანგარიშგების აუდიტის ხელშეკრულების დადების შემთხვევაში (ინფორმაციის წარმოდგენის ვადებს და წარმოსადგენ ინფორმაციას დეტალურად შეგიძლიათ გაეცნოთ ზემოთ მითითებულ წესში). წარსადგენი ინფორმაცია უნდა მოიცავდეს 2024 წლის 21 მაისიდან წარმოშობილ სამართლებრივ ურთიერთობებს. ამასთან შეგახსენებთ, რომ პირველ, მეორე და მესამე ზომითი კატეგორიის სუბიექტთათვის ჩატარებული ფინანსური ანგარიშგების აუდიტთან დაკავშირებით ინფორმაციის წარმოდგენის ვალდებულება ზემოთ აღნიშნულ თარიღამდე ასევე გააჩნდათ აუდიტორებს/აუდიტორულ ფირმებს, რომლებსაც გავლილი არ ჰქონდათ მონიტორინგი ან ბოლო მონიტორინგის შედეგად მინიჭებული ჰქონდათ მეხუთე კატეგორიის დასკვნითი შეფასება; 

• 2024 წლის 31 მაისის მდგომარეობით ,,კატეგორიის გარეშე“ სტატუსის მქონე აუდიტორები/აუდიტორული ფირმები (რომლებიც განისაზღვრნენ სავალდებულო აუდიტორებად/აუდიტორულ ფირმებად) შენარჩუნდებიან სავალდებულო აუდიტორებად/აუდიტორულ ფირმებად (სამსახურის მიერ მონიტორინგის განხორციელებისა და შესაბამისი შედეგების გამოვლენამდე), თუ არაუგვიანეს 2025 წლის 01 იანვრისა სამსახურს წარუდგენენ ინფორმაციას კანონის ამოქმედების შემდგომ (2016 წლის 25 ივნისიდან) პერიოდში დასრულებული (საბოლოოდ დაკომპლექტებული) სულ მცირე 2 ფინანსური ანგარიშგების აუდიტის გარიგების შესახებ, ხოლო თუ კანონის ამოქმედების შემდგომ პერიოდში არ ექნებათ დასრულებული (საბოლოოდ დაკომპლექტებული) სულ მცირე 2 ფინანსური ანგარიშგების აუდიტის გარიგება ან/და არ წარუდგენენ სამსახურს ინფორმაციას  კანონის ამოქმედების შემდგომ პერიოდში დასრულებული (საბოლოოდ დაკომპლექტებული) სულ მცირე 2 ფინანსური ანგარიშგების აუდიტის გარიგების შესახებ, 2025 წლის 1 იანვრიდან განისაზღვრებიან არასავალდებულო აუდიტორებად/აუდიტორულ ფირმებად (ამ წესით განსაზღვრული შესაბამისი უფლებამოსილების/შეზღუდვის გათვალისწინებით). აღნიშნულ შემთხვევაში, არასავალდებულო აუდიტის განმახორციელებელ აუდიტორად/აუდიტორულ ფირმად განსაზღვრისას  სამსახური უფლებამოსილია აუდიტორს/აუდიტორულ ფირმას არ მისცეს მიმდინარე გარიგების საფუძველზე შესასრულებელი, სავალდებულო აუდიტს დაქვემდებარებული აუდიტორული მომსახურებ(ებ)ის დასრულების საშუალება. 
  
  აღნიშნულის გათვალისწინებით, 2024 წლის 31 მაისის მდგომარეობით ,,კატეგორიის გარეშე“ სტატუსის მქონე აუდიტორებმა/აუდიტორულმა ფირმებმა (რომლებიც განისაზღრვნენ სავალდებულო აუდიტორებად/აუდიტორულ ფირმებად) არაუგვიანეს 2025 წლის 01 იანვრისა სამსახურს ოფიციალური განცხადებით წერილობითი ან/და ელექტრონული ფორმით (https://saras.gov.ge/ms/) უნდა მოაწოდონ ინფორმაცია კანონის ამოქმედების შემდგომ პერიოდში დასრულებული (საბოლოოდ დაკომპლექტებული) სულ მცირე 2 ფინანსური ანგარიშგების აუდიტის გარიგების შესახებ, ასეთის არსებობის შემთხვევაში. 
  
  დასრულებული (საბოლოოდ დაკომპლექტებული) ფინანსური ანგარიშგების აუდიტის გარიგებების შესახებ ინფორმაციის წარმოსადგენად შეგიძლიათ იხელმძღვანელოთ წინამდებარე აუდიტორებისთვის და აუდიტორული ფირმისთვის განსაზღვრული ფაილებით. აღნიშნული ფაილების გამოყენების შემთხვევაში გთხოვთ, იგი წარმოადგინოთ შესაბამის განცხადებასთან ერთად როგორც ხელმოწერილი (დასკანერებული სახით), ასევე ელექტრონულად - Excel-ის ფაილის სახით.
  
  „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონში და ,,ხარისხის მართვის სისტემის მონიტორინგის განხორციელების წესის შესახებ“ ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსის 2017 წლის 12 ივლისის Nნ-9 ბრძანებით დამტკიცებულ წესში განხორციელებულ ზემოთ აღნიშნულ და სხვა ცვლილებებთან დაკავშირებით კითხვების არსებობის შემთხვევაში, შეგიძლიათ მოგვმართოთ ელექტრონული ფორმით (https://saras.gov.ge/ms/), ან დაგვირეკოთ ცხელ ხაზზე.