სამსახური (SARAS), მმართველობის ანგარიშგების სახელმძღვანელოს განახლებულ გამოცემას აქვეყნებს

სამსახურმა (SARAS), „მმართველობის ანგარიშგების სახელმძღვანელოს“ განახლებული გამოცემა შეიმუშავა, რომელიც ფართო გამოყენების, სარეკომენდაციო ხასიათის დოკუმენტია, ეფუძნება უახლეს საერთაშორისო პრაქტიკას და არ წარმოშობს ახალ სამართლებრივ ვალდებულებებს. ის ადგენს ძირითად პრინციპებს, რომელთა დაცვაც საწარმოთა ანგარიშგებების სათანადო ფორმით წარმოდგენას და შესადარისობას უზრუნველყოფს. სახელმძღვანელო განსაკუთრებულ ღირებულებას იძენს, მასში მოცემული კონტექსტის შესაბამისი მაგალითების გამო. 

სახელმძღვანელოს ახალ რედაქციაში შეტანილ იქნა ცვლილებები, რაც სუბიექტებს ევროკავშირის კორპორაციული მდგრადობის ანგარიშგების დირექტივით  და მდგრადობის ანგარიშგების ევროპული სტანდარტებით განსაზღვრულ მოთხოვნებზე მიაწვდის ინფორმაციას და დაეხმარება მმართველობის ანგარიშგების სრულყოფის პროცესში. სახელმძღვანელოში ასახული ცვლილებების მიზანია დაინტერესებულ მხარეებს მიაწოდოს დამატებითი მითითებები მდგრადობისა და გარემოსდაცვითი, სოციალური და მმართველობითი საკითხების შესახებ, რომელიც ევროკავშირის კორპორაციული მდგრადობის ანგარიშგებისa დირექტივას და მდგრადობის ანგარიშგების ევროპულ სტანდარტს ეფუძნება. 

გასათვალისწინებელია, რომ სახელმძღვანელო წარმოადგენს განმარტებით დოკუმენტს და არ გააჩნია სავალდებულო იურიდიული ძალა. მიმდინარედ სამსახური ახორციელებს ევროკავშირის კორპორაციული მდგრადობის ანგარიშგების დირექტივის (CSRD) და მდგრადობის ანგარიშგების ევროპულ სტანდარტის (ESRS) თარგმნასა და სამოქმედოდ შემოღებასთან დაკავშირებულ დინამიურ პროცესს. სახელმძღვანელო დოკუმენტსა და საკანონმდებლო ცვლილებას შორის სხვაობის არსებობის შემთხვევაში, უპირატესობა მიენიჭება კანონმდებლობის დებულებებს და სახელმძღვანელოში განხორციელდება რედაქციული კორექტირება საჭიროებისამებრ. 

სახელმძღვანელო შემუშავდა საერთაშორისო საფინანსო კორპორაციასთან (IFC) თანამშრომლობით, IFC-ის ევროპისა და ცენტრალური აზიის გარემოსდაცვითი, სოციალური და მმართველობის პროგრამის ფარგლებში, რომელიც შვეიცარიის ეკონომიკურ საქმეთა სამდივნოსთან SECO-სთან პარტნიორობით ხორციელდება.

სამსახური განსაკუთრებულ მადლობას უხდის IFC-ს სახელმძღვანელოს შემუშავების პროცესში შეტანილი წვლილისთვის.