ანგარიშგების წარდგენის პროცესი გრძელდება! გთხოვთ, წარმოადგინოთ ანგარიშგება დაუყოვნებლივ, ანგარიშგების ხელმისაწვდომობისთანავე

სამსახურის წარმომადგენლებმა CFRR-ის მიერ გამართულ სემინარში მიიღეს მონაწილეობა

29 ნოემბერს, მსოფლიო ბანკის ფინანსური ანგარიშგების რეფორმების ცენტრის (CFRR) მე-15 საიუბილეო წლისთავის აღსანიშნად, CFRR-ის ორგანიზებითა და ავსტრიის ფინანსთა სამინისტროს მასპინძლობით, ვენაში კონფერენცია გაიმართა. აღნიშნულ ღონისძიებას საქართველოდან ფინანსთა სამინისტროს, პროფესიული ორგანიზაციების, აკადემიური წრეებისა და ბუღალტრული აღრიცხვის, ანგარიშგებისა და აუდიტის ზედამხედველობის სამსახურის წარმომადგენლები დაესწრნენ. 

სემინარმა 150-მდე დელეგატს უმასპინძლა სხვადასხვა ქვეყნიდან, მათ შორის, მთავრობის წარმომადგენლებს, საერთაშორისო პარტნიორებს, პროფესიონალ და აკადემიურ მომხსენებლებსა და წამყვან საერთაშორისო და ევროკავშირის ინსტიტუტების ექსპერტებს. 

სემინარის მიზანი იყო ქვეყნების წარმომადგენლების ინფორმირება, როგორც ფინანსური და მდგრადობის ანგარიშგების, ასევე საჯარო და კერძო სექტორის აუდიტის მიმართულებით არსებული სიახლეების შესახებ; გარდა ამისა, შესაბამისი რეფორმების მხარდაჭერის უზრუნველყოფა და რეგიონულ დონეზე გამოცდილების გაზიარება.

აღნიშნულ სემინარზე პანელური განხილვა გაიმართა, თემაზე: „საერთაშორისო წინსვლა ფინანსური და მდგრადობის ანგარიშგების მიმართულებით“. დისკუსიაში სამსახურის უფროსმა, დავით მჭედლიძემ მიიღო მონაწილეობა, ამ მიმართულებით საქართველოს მთავარი მიღწევების შესახებ ისაუბრა და დონორ ორგანიზაციებს მადლობა გადაუხადა მრავალი პროექტის განხორციელებაში გაწეული დახმარებისთვის. კერძოდ, პროგრამის შედეგად, ანგარიშგება-აუდიტის სფეროს კანონმდებლობა კიდევ უფრო დაუახლოვდა ევროკავშირის მოთხოვნებს, საზოგადოებისთვის უფრო ნათელი გახდა გამჭვირვალე ანგარიშგების სარგებლები, ფასს სტანდარტის ცნობადობა საგრძნობლად გაიზარდა, ასევე გაიზარდა სამსახურის შესაძლებლობები აუდიტის ინსპექტირების მიმართულებით და სხვ. დავით მჭედლიძემ აღნიშნა, რომ ქვეყანაში კვლავ მიმდინარეობს სფეროს განვითარებისათვის მნიშვნელოვანი პროექტები და სამსახური კვლავინდებურად აქტიურად ჩაერთვება მიმდინარე თუ დაგეგმილ რეგიონულ პროექტებში, რომელიც ქვეყანაში სფეროს გაძლიერებას შეუწყობს ხელს.