IAASB-ი ნაკლებად რთული საწარმოების აუდიტის ახალ სტანდარტს დაამტკიცებს

მცირე ზომის, ნაკლებად რთულ საწარმოებს მნიშვნელოვანი წვლილი შეაქვთ მსოფლიო ეკონომიკაში და ისინი გლობალური მასშტაბით საწარმოთა უმრავლესობას წარმოადგენენ. ამავდროულად, აუდიტის საერთაშორისო სტანდარტებში სულ უფრო მეტი ყურადღება უნდა დაეთმოს რთულ სტრუქტურებსა და ოპერაციებს და მათმა ამგვარმა გართულებამ შეიძლება ნაკლებად რთული საწარმოების აუდიტის პროცესი ზედმეტი გამოწვევების წინაშე დააყენოს. 

შესაბამისი გამოხმაურებების და უკუკავშირის საფუძველზე, აუდიტისა და მარწმუნებელი მომსახურების საერთაშორისო სტანდარტების საბჭომ (IAASB) სტანდარტის სამუშაო ვერსია შეიმუშავა, რომელიც ნაკლებად რთული საწარმოს აუდიტის დამახასიათებელი ბუნებისა და გარემოებების პროპორციულია, ამავდროულად დაინტერესებული მხარეების გამოწვევებს პასუხობს და საკითხის გლობალური მასშტაბით გადაწყვეტას წარმოადგენს.

ახალი სტანდარტის პროექტის თაობაზე საჯარო კონსულტაცია გაგრძელდება 2022 წლის 31 იანვრამდე. როგორც კი ის საბოლოო სახეს მიიღებს, იურისდიქციული განსხვავებების რისკების შემცირებასთან ერთად, სტანდარტი მზარდ გლობალურ მოთხოვნებსაც დააკმაყოფილებს. საეტაპო მნიშვნელობის მქონე ახალი სტანდარტი IAASB-ის საქმიანობაში ახალ ეპოქას მოასწავებს და ამდენად დაინტერესებულ მხარეთა მხრიდან რეაგირებასა და გამოხმაურებას საჭიროებს. 

ახალი, განცალკევებული აუდიტის სტანდარტი:

• განკუთვნილია მხოლოდ ნაკლებად რთული საწარმოების აუდიტისთვის;
• ეფუძნება აუდიტის საერთაშორისო სტანდარტების ძირეულ კონცეფციებს; 
• შემუშავებულია იმგვარად, რომ იყოს მარტივად გასაგები, ნათელი და ლაკონიური;
• თანმიმდევრულობითა და თავსებადობით ამცირებს იურისდიქციული განსხვავებების რისკის წარმოშობას;
• უზრუნველყოფს აუდიტის სათანადო ხარისხით შესრულებას.

საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახური პროფესიულ წრეებთან ერთად განიხილავს ზემოაღნიშნული სტანდარტის საქართველოში სამოქმედოდ შემოღების და მისი თავისებურებების საკითხს.