IFIAR-მა ინსპექტირების შედეგების ყოველწლიური კვლევის ამსახველი ანგარიში გამოაქვეყნა

15 მარტს, აუდიტის დამოუკიდებელ საზედამხედველო ორგანოთა საერთაშორისო ფორუმმა (IFIAR) ინსპექტირების შედეგების ყოველწლიური კვლევის ამსახველი ანგარიში გამოაქვეყნა. კვლევა 54 წევრი ქვეყნის საზედამხედველო ორგანოების მიერ მომზადებულ იმ მონაცემებს ეფუძნება, რომელიც ექვსი უმსხვილესი გლობალური აუდიტორული ფირმის ქსელთან დაკავშირებულ აუდიტორულ ფირმებში განხორციელებული ინსპექტირების შედეგად იქნა მიღებული. კვლევაში ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის მეშვეობით, საქართველომაც მიიღო მონაწილეობა.

კვლევის ფარგლებში, IFIAR-მა ინსპექტირების ორ ძირითად მიმართულებასთან დაკავშირებული ინფორმაცია შეაგროვა: ხარისხის კონტროლის სისტემები და აუდიტორული გარიგებები. ხარისხის კონტროლის სისტემები აუდიტის სფეროს საზედამხედველო სტრუქტურების და აუდიტორული ფირმის ინტერესის საგანია, რადგან სწორედ ეს სისტემები ქმნის ხარისხიანი აუდიტის განხორციელების საფუძველს. 

კვლევაში ასახული შედეგები მაღალი ხარისხის აუდიტის შესრულების და მუდმივი გაუმჯობესების აუცილებლობაზე მიუთითებს. IFIAR-ი აუდიტორულ ფირმებს მოუწოდებს ხარისხის კონტროლის სისტემაში ისეთი სფეროები გამოავლინონ, რომლებიც გაუმჯობესებას საჭიროებს და შესაბამისი ზომები მიიღონ.