ანგარიშგების წარდგენის პროცესი გრძელდება! გთხოვთ, წარმოადგინოთ ანგარიშგება დაუყოვნებლივ, ანგარიშგების ხელმისაწვდომობისთანავე

როგორ აფასებენ საწარმოები ახალ მარეგულირებელ ჩარჩოს - „თვინინგის“ პროექტის ფარგლებში გამოკითხვა ჩატარდა

ილიას სახელმწიფო უნივერსიტეტმა, „თვინინგის“ პროექტის ფარგლებში გამოკითხვა ჩაატარა, რომელიც ანგარიშგება-აუდიტის რეფორმის შედეგად განხორციელებული ცვლილებების შეფასების ასახვას ემსახურებოდა. 

გამოკითხვის წინასწარი შედეგები აჩვენებს, რომ ახალმა მარეგულირებელმა ჩარჩომ მნიშვნელოვნად გაზარდა ფინანსური ანგარიშგების გამჭვირვალობა, მნიშვნელოვნად გააუმჯობესა ფინანსურ ანგარიშგებაში მოცემული ინფორმაციის აღქმადობა და ფინანსური ინფორმაციის მიწოდების დროულობა. კვლევის მიხედვით, ფინანსური ანგარიშგების თვისობრივი მახასიათებლები გარე მომხმარებელთა მოთხოვნებს შეესაბამება. 

ამასთან, გამოკითხულთა დიდი ნაწილი დარწმუნებულია, რომ საერთაშორისოდ აღიარებული ფინანსური ანგარიშგების სტანდარტების მიღება საქართველოში მოქმედ კომპანიებს შესაძლებლობას აძლევს, გააუმჯობესონ ადგილობრივი ანგარიშგების საერთაშორისო ცნობადობა და, ასევე, გაზარდონ საკუთარი კომპანიების ღირებულება.

მიუხედავად იმისა, რომ გამოკითხულთა მცირეოდენი უმრავლესობის აზრით, ანგარიშგების ახალი მარეგულირებელი ჩარჩოს მოთხოვნების დაკმაყოფილება შეუძლებელია დამატებითი ძალისხმევის და ხარჯების გარეშე, რეგულირების ზეგავლენის ზოგადი შეფასება მაინც დადებითი რჩება.

გამოკითხვაში მონაწილეთა უმრავლესობის შეფასებით, სამსახურის მიერ განხორციელებული საქმიანობა და ინიციატივები არა მხოლოდ გადამწყვეტ როლს ასრულებს ანგარიშგების ახალი მოთხოვნების დანერგვასა და აღსრულებაში, არამედ გავლენას ახდენს აუდიტისა და ანგარიშგების ხარისხზე.   

გამოკითხვის საბოლოო შედეგები, სავარაუდოდ, 2020 წლის ნოემბერში გამოქვეყნდება.