ფასს სტანდარტის და მმართველობის ანგარიშგების აქტუალური საკითხების შესახებ ღონისძიება გაიმართა

14 ნოემბერს, საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა, მსოფლიო ბანკის მხარდაჭერით, ღონისძიება გამართა, თემაზე „ფასს სტანდარტის და მმართველობის ანგარიშგების აქტუალური საკითხები“. ღონისძიებას სდპ-ების და I კატეგორიის საწარმოების წარმომადგენლები, მათი მომსახურე აუდიტორები და აკადემიური სექტორის წარმომადგენლები დაესწრნენ.

აღნიშნულ ღონისძიებას მოწვეული სტუმარი, ბუღალტრული აღრიცხვის საერთაშორისო სტანდარტების საბჭოს (IASB) წევრი - გარი კაბურეკი წარუძღვა. მისი გამოსვლის მთავარი თემა ფასს სტანდარტების და მმართველობის ანგარიშგების აქტუალური საკითხების მიმოხილვა იყო. 

გარი კაბურეკი ბუღალტრული აღრიცხვის საერთაშორისო სტანდარტების საბჭოს (IASB) წევრად პირველად 2013 წელს დაინიშნა, ხოლო 2017 წელს - განმეორებით. ის ასევე Financial Executives International-ის აქტიური წევრიც გახლავთ. IASB-მდე, გარი კაბურეკი კორპორაციაში „XEROX“ ფინანსების სფეროში ვიცე პრეზიდენტის პოზიციას იკავებდა, ასევე თანამშრომლობდა აშშ-ის ისეთ მარეგულირებელ ორგანოებთან, როგორიცაა აშშ-ის საჯარო კომპანიების ფინანსური აღრიცხვის ზედამხედველობის საბჭო (PCAOB) და ფინანსური აღრიცხვის სტანდარტების საბჭო (FASB).

ღონისძიების ფარგლებში, აუდიტორიის წინაშე პრეზენტაციით წარდგნენ ასევე სამსახურის წარმომადგენლები და საქართველოში მიმდინარე ანგარიშგების რეფორმის შედეგებზე ისაუბრეს. 

პრეზენტაციების სანახავად, გთხოვთ, ეწვიოთ შემდეგ ბმულებს: ბმული 1, ბმული 2.