სამსახურის წარმომადგენლები თურქეთის აუდიტის საზედამხედველო ორგანოს ეწვივნენ

2017 წლის 10 ივლისს, საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის წარმომადგენლები თურქეთის აუდიტის საზედამხედველო ორგანოს (KGK) ერთდღიანი ვიზიტით ეწვივნენ.

აღნიშნული ვიზიტის ძირითადი ნაწილი სამსახურის საქმიანობისათვის მნიშვნელოვან მიმართულებებთან დაკავშირებული პრაქტიკული გამოცდილების გაზიარებას დაეთმო. KGK -ს შესაბამისი დეპარტამენტების ხელმძღვანელებმა ქართულ მხარეს თავიანთი გამოცდილება გააცნეს ზედამხედველობას დაქვემდებარებულ ისეთ სფეროებში, როგორიცაა აუდიტორთა და აუდიტორული ფირმების რეესტრის მართვა, აუდიტორული ფირმების მიერ განგრძობითი განათლებისა და წლიური ანგარიშგების სისტემის ადმინისტრირება, ხარისხის კონტროლის სისტემის შემოწმება, აღსრულების პრაქტიკა და სხვ.

ვიზიტის ფარგლებში, სამსახურის წარმომადგენლები თურქეთის აუდიტის საზედამხედველო ორგანოს საბჭოს თავმჯდომარეს, ბატონ გენჩ ოსმან იარაშლს შეხვდნენ. აღნიშნული შეხვედრის მონაწილეებმა ქვეყნებში აუდიტორული სფეროს მდგომარეობა, რეფორმების ამოცანები და მიმდინარეობა განიხილეს და, ასევე, სამომავლო თანამშრომლობის პერსპექტივებზე იმსჯელეს.