გაიმართა მმართველობის ანგარიშგების მომზადების შესახებ ცნობიერების ამაღლებისთვის გამიზნული ღონისძიებები

საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის ინიციატივითა და მსოფლიო ბანკის პარტნიორობით, 1 და 2 თებერვალს გაიმართა მმართველობის ანგარიშგების მომზადების შესახებ ცნობიერების ამაღლებისთვის გამიზნული სამი ღონისძიება, რომელსაც საზოგადოებრივი დაინტერესების პირებისა და I და II კატეგორიის საწარმოების 600-მდე წარმომადგენელი დაესწრო. აღნიშნული ღონისძიებები დამსწრე საზოგადოების მნიშვნელოვანი ინფორმაციით უზრუნველყოფას და წამყვანი ქვეყნების საუკეთესო პრაქტიკის გაზიარებას ისახავდა მიზნად. 

ღონისძიების ფარგლებში, სამსახურის წარმომადგენლებმა მმართველობითი ანგარიშგების წარდგენასთან დაკავშირებული კანონის მოთხოვნები მიმოიხილეს და აუდიტორიას სამსახურის მიერ მსოფლიო ბანკისა და სხვა ექპერტების მხარდაჭერით მომზადებული მმართველობის ანგარიშგების სახელმძღვანელო  დააანონსეს. სახელმძღვანელო სუბიექტებისთვის ანგარიშგების მომზადების პროცესის გამარტივებას ემსახურება და უახლოეს მომავალში ხელმისაწვდომი გახდება სამსახურის ვებგვერდზე.

დამსწრე საზოგადოების წინაშე პრეზენტაციით წარდგნენ მსოფლიო ბანკის კონსულტანტი ირინა გორდელაძე და მოწვეული ექსპერტი - ჰოლანდიის ტილბურგის უნივერსიტეტის ბიზნესისა და საფინანსო სამართლის პროფესორი, Philips Lighting კორპორაციის ვიცე-პრეზიდენტი ერიკ ვერმიულენი. დამსწრე საზოგადოებას მმართველობის ანგარიშგებების მომზადების ძირითადი მიზნების, მოწინავე კორპორაციების საუკეთესო პრაქტიკისა და ისეთი თანამედროვე ტენდენციების გაცნობის საშუალება მიეცა, როგორიცაა ინტეგრირებული ანგარიშგება. 

იხილეთ პრეზენტაციები: (ბმული1, ბმული2, ბმული3, ბმული4).