სამსახურის (SARAS) უფროსმა, საქართველოს საერთაშორისო სადაზღვევო კონფერენცია 2025 -ში მიიღო მონაწილეობა

2025 წლის 12–13 ივნისს, ბათუმში, სასტუმრო „შერატონში“, საქართველოს დაზღვევის სახელმწიფო ზედამხედველობის სამსახურისა და XPRIMM-ის (საერთაშორისო სადაზღვევო მედია და ღონისძიებების ორგანიზატორი ორგანიზაცია) ორგანიზებით საქართველოს საერთაშორისო სადაზღვევო კონფერენცია 2025 გაიმართა.

ღონისძიება მნიშვნელოვან პლატფორმას წარმოადგენდა სადაზღვევო სექტორში გლობალურ ტენდენციებზე, რეგულაციურ სტანდარტებსა და ტექნოლოგიურ განვითარებაზე მსჯელობისთვის, ასევე მდგრადობის მიმართულებით საერთაშორისო პრაქტიკისა და გამოცდილების გაზიარებისთვის. კონფერენციამ გააერთიანა სფეროში მოღვაწე საჯარო და კერძო სექტორის, ასევე მარეგულირებელი ორგანოების, სადაზღვევო კომპანიების, საერთაშორისო ორგანიზაციებისა და სფეროს სხვა წარმომადგენლები. 

კონფერენციის მეორე დღეს, 13 ივნისს, სესიაზე „მდგრადობა საქართველოს სადაზღვევო სექტორში: შესაბამისობა გლობალურ ტენდენციებთან“ პრეზენტაციით წარდგა ბუღალტრული აღრიცხვის, ანგარიშგებისა და აუდიტის ზედამხედველობის სამსახურის (SARAS) უფროსი დავით მჭედლიძე. მისი პრეზენტაცია შეეხებოდა მდგრადობის ანგარიშგების სფეროში მიმდინარე რეფორმებსა და იმ მნიშვნელოვან პროცესებს, რომლებიც საქართველოსა და ევროკავშირის სტანდარტების ჰარმონიზაციას უკავშირდება.

პრეზენტაციაში განხილული იყო შემდეგი საკითხები:

• საქართველოს მიერ ევროკავშირის დირექტივების (2006/43/EC, 2013/34/EU და რეგულაცია 537/2014) იმპლემენტაციის ვალდებულებები;
• არაფინანსური ანგარიშგებიდან მდგრადობის ანგარიშგებაზე გადასვლის პროცესი;
• თანამშრომლობა საერთაშორისო ორგანიზაციებთან – მათ შორის მსოფლიო ბანკთან და IFC-თან – ცნობიერების ამაღლებისა და გზამკვლევების შემუშავების მიმართულებით;
• ევროპის მდგრადობის ანგარიშგების სტანდარტების (ESRS) თარგმნისა და ინტერპრეტაციის პროცესები, მათ შორის სპეციალური ექსპერტთა კომიტეტის საქმიანობა და ერთიანი ტერმინოლოგიის დამკვიდრება;
• კანონმდებლობის განახლების პროცესი, რომელიც მიზნად ისახავს CSRD-ის დანერგვის სამართლებრივ უზრუნველყოფას. 

სამსახურის უფროსმა, დავით მჭედლიძემ ასევე ყურადღება გაამახვილა ევროკავშირის დროებითი გადაწყვეტილებით გათვალისწინებულ „Omnibus“ ცვლილებებზე, რაც ანგარიშგების ვადის 2027 წლამდე გადავადებას და სტანდარტების ნებაყოფლობით გამოყენებას გულისხმობს. სამსახურის ხედვით, აღნიშნული ცვლილებები შესაძლებლობას იძლევა ქართულ კანონმდებლობაში ეტაპობრივად განხორციელდეს CSRD-ის და მასთან დაკავშირებული აუდიტის მოთხოვნები.

სამსახურის აქტიური მონაწილეობა საერთაშორისო სადაზღვევო კონფერენციაში კიდევ ერთხელ ადასტურებს საქართველოს მზადყოფნას, გააძლიეროს მდგრადობის ანგარიშგების სფერო და დააყენოს ევროკავშირის დირექტივების თანმიმდევრული იმპლემენტაცია სახელმწიფო განვითარების დღის წესრიგში.