ფინანსური ანგარიშგების მიმოხილვის შედეგად გამოვლენილი შეუსაბამობები და მიმოხილვის პრიორიტეტები - მეხუთე გამოცემა

ფინანსური ანგარიშგებების ხარისხის ზრდის ხელშეწყობის მიზნით, სამსახური, ევროკავშირის პრაქტიკის გათვალისწინებით, ყოველწლიურად მიმოიხილავს საწარმოთა მიერ წარდგენილ ფინანსურ ანგარიშგებებს, ასევე ავლენს იმ პრიორიტეტებსა და მიდგომებს, რომლებსაც განსაკუთრებულ ყურადღებას მიაქცევს ფინანსური ანგარიშგების მიმოხილვისას. მათი გათვალისწინებით ყოველწლიურად ქმნის ფინანსური ანგარიშგების მიმოხილვის შედეგად გამოვლენილი შეუსაბამობებისა და მიმოხილვის პრიორიტეტების დოკუმენტს. ზემოხსენებულ საკითხებთან ერთად დოკუმენტში განხილულია ხარისხიანი ფინანსური ანგარიშგების მახასიათებლები, რომლის მიხედვითაც საწარმოებმა უნდა მოამზადონ ყოველწლიური, საერთო დანიშნულების ფინანსური ანგარიშგება. 

დოკუმენტში ასახულია სამსახურის მიერ 2024 წელს შერჩეული 2022-2023 წლების ფინანსური ანგარიშგებების ფასს სტანდარტებთან შესაბამისობის მიმოხილვის პროცესში გამოვლენილი ძირითადი შეუსაბამობები. კერძოდ, სამსახურის მიერ მომზადებულ დოკუმენტში შეჯამებულია სდპ-ების, I და II კატეგორიის საწარმოთა ნაწილის (სდპ-ების საწარმოთა ერთობლიობის 6%; I კატეგორიის საწარმოთა ერთობლიობის 10%; II კატეგორიის საწარმოთა ერთობლიობის 4%) 2022-2023 წლების ფინანსური ანგარიშგებების ფასს სტანდარტებთან შესაბამისობის მიმოხილვის შედეგად გამოვლენილი ძირითადი შეუსაბამობები, რომელთა გათვალისწინებით საწარმოები უფრო მაღალი ხარისხის ფინანსური ანგარიშგებების წარდგენას შეძლებენ. სამსახური, გამოვლენილი შეუსაბამობების ნაწილში, საწარმოებისთვის შესაბამისი რეკომენდაციებს გასცემს და ფინანსურ ანგარიშგებაში ფასს სტანდარტებთან შეუსაბამობების აღმოფხვრის გზებზე მიუთითებს. დოკუმენტში წარმოდგენილია გამოვლენილი შეუსაბამობების სიხშირე 2024 წლის საანგარიშგებო პერიოდისთვის მიმოხილულ ანგარიშგებებში. ასევე, გამჟღავნებულია ინფორმაცია, სამსახურის მიერ მიმოხილვის შედეგად საწარმოებისთვის გაგზავნილი მითითებების შესრულების მონიტორინგის შედეგების შესახებ, რაც მეტად ინფორმატიულს და ღირებულს ხდის დოკუმენტს. მასში ასევე მოცემულია ინფორმაცია იმ პრიორიტეტებისა და მიდგომების შესახებ, რასაც სამსახური განსაკუთრებულ ყურადღებას მიაქცევს 2023 და 2024 წლების საანგარიშგებო პერიოდების ფინანსური ანგარიშგებების მიმოხილვისას. ამასთანავე, აღწერილია, თუ რა კრიტერიუმებით შეარჩევს სამსახური სუბიექტების მიერ წარდგენილ და გასაჯაროებულ ფინანსურ ანგარიშგებებს, მათი მიმოხილვის მიზნით. აღსანიშნავია, რომ გამოცემაში გათვალისწინებულია „აღსრულების საერთო ევროპული პრიორიტეტები 2024 წლის კორპორაციულ ანგარიშგებასთან მიმართებით“ (European common enforcement priorities for 2024 corporate reporting) დოკუმენტში წამოჭრილი საკითხები.

შეგახსენებთ, რომ ანგარიშგების წარდგენისა და გასაჯაროების პროცესი მიმდინარეობს უწყვეტად. სუბიექტებმა 2024 წლის საანგარიშგებო პერიოდის ფინანსური ანგარიშგება უნდა წარმოადგინონ დაუყოვნებლივ, ანგარიშგების ხელმისაწვდომობისთანავე,  არაუგვიანეს საანგარიშგებო პერიოდის დასრულებიდან 9 თვის ვადაში ანგარიშგების პორტალზე. 

სამსახურის ხედვით, გამჭვირვალე, ხარისხიანი, დროული და სანდო კორპორაციული ინფორმაციის, ცენტრალურ სივრცეში ხელმისაწვდომობა, ზრდის ინვესტორთა, კრედიტორთა და სხვა დაინტერესებულ მხარეთა ნდობას და დაცულობას, რაც თავის მხრივ ხელს უწყობს კაპიტალის ბაზრის განვითარებასა და საწარმოებისთვის ფინანსებზე ხელმისაწვდომობის ზრდას.

ანგარიშგებების დროულობა უაღრესად მნიშვნელოვანია კაპიტალის ბაზრის განვითარებისთვის და ფინანსებზე ხელმისაწვდომობის ზრდისთვის. ანგარიშგების დროული წარდგენით თქვენს ორგანიზაციას უქმნით სანდო და გამჭვირვალე იმიჯს, ეხმარებით ინვესტორების მოძიებაში და ზრდით საბანკო სექტორთან საიმედო პარტნიორობის პოტენციალს.