მსოფლიო ბანკის ორგანიზებით, ბაფ-სა და უნივერსიტეტებს შორის თანამშრომლობის მემორანდუმის გაფორმების და სასწავლო მასალების გადაცემის ღონისძიება გაიმართა

22 ივნისს, მსოფლიო ბანკის ორგანიზებით, ევროკავშირისა და მსოფლიო ბანკის ერთობლივი ფინანსური ჩართულობისა და ანგარიშვალდებულების პროექტის ფარგლებში, ბაფ-სა და უნივერსიტეტებს შორის თანამშრომლობის მემორანდუმის გაფორმების და სასწავლო მასალების გადაცემის ღონისძიება გაიმართა.

ღონისძიებაზე ბაფ-ისა და შვიდი უნივერსიტეტის (ივანე ჯავახიშვილის სახელობის თბილისის სახელმწიფო უნივერსიტეტი, ილიას სახელმწიფო უნივერსიტეტი, საქართველოს ტექნიკური უნივერსიტეტი, სოხუმის სახელმწიფო უნივერსიტეტი, კავკასიის უნივერსიტეტი, შავი ზღვის საერთაშორისო უნივერსიტეტი, საქართველოს უნივერსიტეტი) წარმომადგენლებმა ურთიერთთანამშრომლობის მემორანდუმს მოაწერეს ხელი.

შეხვედრაზე, მსოფლიო ბანკის მიერ 2021 წელს დაანონსებული გეგმის ფარგლებში, რომელიც უნივერსიტეტების სხვადასხვა მიმართულებით ხელშეწყობას ემსახურება, უნივერსიტეტებს, ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის მიერ აღიარებული სასერტიფიკაციო პროგრამის შესაბამისი  სახელმძღვანელოები გადაეცათ. შეგახსენებთ, რომ გასულ წელს, მსოფლიო ბანკმა უნივერსიტეტების წარმომადგენლებთან შეხვედრა გამართა და განათლების სფეროსთან დაკავშირებული სამომავლო გეგმები გააცნო, რომელიც მათ მხარდაჭერას ითვალისწინებს, როგორც სასწავლო, ასევე საგამოცდო პროცესის დახვეწის მიმართულებით. 

შეხვედრას სამსახურის წარმომადგენელიც დაესწრო და აუდიტორიის წინაშე სიტყვით წარდგა. მან პროფესიული სერტიფიცირების სტანდარტებზე, მათ მნიშვნელობასა და იმ შესაძლებლობებზე ისაუბრა, რომელიც სტუდენტებს პროფესიული სერტიფიცირების პროცესში მიეცემათ, მას შემდეგ, რაც უნივერსიტეტები სამსახურის მიერ სტანდარტით დადგენილ, საგნების აღიარებისთვის საჭირო კრიტერიუმებს დააკმაყოფილებენ.