„მცირე და საშუალო აუდიტორული ფირმების მომავალი: ციფრული ტრანსფორმაცია“ - მსოფლიო ბანკი მორიგ ღონისძიებას გამართავს

4 მარტს, 16:00 საათზე, მსოფლიო ბანკი, ევროკავშირისა და მსოფლიო ბანკის ერთობლივი ფინანსური ჩართულობისა და ანგარიშვალდებულების პროექტის ფარგლებში, ონლაინ ღონისძიებას გამართავს მცირე და საშუალო აუდიტორული ფირმებისთვის, თემაზე: „მცირე და საშუალო აუდიტორული ფირმების მომავალი: ციფრული ტრანსფორმაცია“

შეხვედრა მსოფლიო ბანკის მიერ 2020 წელს წამოწყებული ვებინარების სერიის ნაწილია. სერია მსოფლიო ბანკმა მცირე და საშუალო აუდიტორული ფირმების (SMPs) მხარდასაჭერად შეიმუშავა, რათა ფირმებს პანდემიის პირობებში შესაძლებლობების განვითარებაში გაუწიოს დახმარება.

ვებინარის წამყვანი კვლავ მცირე და საშუალო ზომის საწარმოთა ბუღალტერთა და აუდიტორთა ევროპული ფედერაციის (EFAA) დირექტორი და მსოფლიო ბანკის კონსულტანტი პოლ თომფსონი იქნება; მოწვეული მომხსენებელი კი - ახალი ტექნოლოგიების და დარგთაშორისი ინოვაციების სფეროს მრჩეველი და EFAA-ის ციფრული სამუშაო ჯგუფის თავმჯდომარე, მარტინ დე ბიე. შეხვედრაზე ისინი განმარტავენ, თუ რატომ უნდა გამოიყენონ მცირე და საშუალო აუდიტორულმა ფირმებმა ციფრული გარდაქმნა და შეიძინონ ასეთი ტრანსფორმაციისთვის საჭირო ცნობიერება, უნარები და ინსტრუმენტები.  მონაწილეები, ასევე, ციფრულ ტრანსფორმაციაში დამხმარე ინსტრუმენტებს და იმ ფირმების გამოცდილებას გაეცნობიან, რომლებმაც უკვე განახორციელეს ასეთი გარდაქმნა.

იხილეთ დღის წესრიგი.  

ვებინარი Zoom-ის პლატფორმაზე, ინგლისურ ენაზე ჩატარდება ქართული სინქრონული თარგმანით. დასასწრები ბმული, ღონისძიების დაწყებამდე ნახევარი საათით ადრე, სამსახურის ვებგვერდსა და სოც. ქსელში განთავსდება.