მცირე და საშუალო აუდიტორული ფირმებისთვის დისტანციური შეხვედრა გაიმართა

30 ივნისს, ევროკავშირის „თვინინგის” პროექტის - „ფინანსური აღრიცხვის და აუდიტის ხარისხის ამაღლება საქართველოში“ - ფარგლებში, ფინანსთა სამინისტროს ბუღალტრული აღრიცხვის, ანგარიშგების და აუდიტის ზედამხედველობის სამსახურის და პროფესიული ორგანიზაციების მხარდაჭერით, საქართველოში რეგისტრირებული მცირე და საშუალო აუდიტორული ფირმებისსთვის ონლაინ ღონისძიება გაიმართა. 

ღონისძიებაზე, აუდიტორიის წინაშე საბერძნეთის სერტიფიცირებულ საჯარო ბუღალტერთა ინსტიტუტის (S.O.E.L) სამეთვალყურეო საბჭოს ვიცე-პრეზიდენტი - აპოსტოლოს პოიზოსი და SOL Crowe-ის დირექტორთა საბჭოს კონსულტანტი - დიმიტრიოს დრაკოსი წარდგნენ. მათ შემდეგი საკითხები მიმოიხილეს: 

• აუდიტის პროფესია საბერძნეთში - რეგულირების ძირითადი ასპექტები, ბუღალტერთა და აუდიტორთა რეესტრები, სარეგისტრაციო მოთხოვნები, პროფესიული ორგანიზაცაიის სტრუქტურა და საქმიანობა, პროფესიული მომსახურების ბაზრის მიმოხილვა. 
• შერწყმა, როგორც მცირე და საშუალო აუდიტორული ფირმების საქმიანობის გაუმჯობესების ერთ-ერთი საშუალება - შერწყმის თაობაზე არსებული პრაქტიკული მაგალითის ისტორიული მიმოხილვა, ძირითადი გამოწვევები, კორპორაციული სტრუქტურა და წესდება.

დამსწრე საზოგადოებას კითხვების დასმის საშუალებაც მიეცა.